In 2011, sannadh cúram breise don Ghníomhaireacht
um Chomhar idir Rialálaithe Fuinnimh (ACER) faoi Rialachán (AE) Uimh 1227/2011
ó Pharlaimint na hEorpa agus ón gComhairle maidir le sláine agus trédhearcacht
an mhargaidh mórdhíola fuinnimh (REMIT) a glacadh ar 8 Nollaig 2011.
Cúlra
Tugtar isteach le REMIT creat dlíthiúil
sainiúil don earnáil maidir le maoirseacht a dhéanamh ar mhargaí mórdhíola
fuinnimh. Is é an aidhm cúbláil margaí a bhrath agus a dhíspreagadh. Den chéad
uair, déanfar sciathadh ar thrádáil fuinnimh ag leibhéal AE le droch-úsáid a
nochtadh.
Is riachtanach iad sláine agus trédhearcacht
le margaí fuinnimh a fheidhmiú mar is ceart agus le muinín na rannpháirtithe sa
mhargadh agus na dtomhaltóirí deiridh a chur chun cinn.
Nuair a chuirtear REMIT i bhfeidhm go hiomlán:
beidh ACER freagrach as sonraí ar
mhargaí mórdhíola a bhailiú agus anailís a dhéanamh orthu chomh maith le haon
fhaisnéis eile le cásanna féideartha a shainaithint maidir le droch-úsáid
margaí.
déanfaidh ACER fógra a thabhairt
do na hÚdaráis Rialála Náisiúnta (NRAanna) lena mbaineann i ndiaidh measúnú
tosaigh, agus nuair a bhíonn foras ann le creidiúint gur tharla drochiompar i
ndáiríre.
Iarrfar ar údaráis rialála sna Ballstáit
imscrúdú a dhéanamh agus pionóis a chur i bhfeidhm mar chuidiú le stop agus cosc
a chur ar chúbláil margaí.
Is cúram casta agus leochaileach é sin mar
pléann sé le táirgí agus margaí a thrádáiltear go casta, agus de bhrí gur ceart
maoirseacht a dhéanamh go hairdeallach gan chur isteach go míchuí, áfach, ar
fheidhmiú na margaí fuinnimh.
Le cuidiú leis na NRAanna chun REMIT a chur i
bhfeidhm, d'fhoilsigh ACER Treoir neamhcheangailteach. Chuir ACER faisnéis agus
uirlisí ar fáil le cuidiú le rannpháirtithe margaí a gcuid oibleagáidí nua faoi
REMIT a chomhlíonadh.
